ممممممممممممم
بكل صراحة انا تابعت ستار اكادميى
فى موسم واحد له
و ما اقدرش اوصف لكم ندمى
بعد ما الموسم خلص على متابعته
المهم
فى مقال بناقش موضوع البرنامج ده قرأته
فحيبت انه اشرككم بيه و بيقووووووووول
1..2..3..تست
(test) مايك تست تست
المايك شغال يا عم برعى
ايون شغال يا أبلة
طب تمام الحمد لله
احم احم
السلام عليكم و رحمة الله و بركاته
ركزوا معايا بأة الله يكرمكم
فى ظل الإنفتاح اللى احنا عايشين فيه يا ولاد و بعد أن أصبح العالم حارة صغيرة بشبابيك كبيرة و كله مفتح على بعضه و بعدما انتشرت الفضائيات انتشار النار فى الهشيم و بقينا بنشوف اللى مكناش نحلم نشوفه من عشر سنين و مكنش يجى فى بال واحد مننا انه هيشوفه فى يوم من الأيام فبأة طبيعى جداً إننا نشوف شاب من إياهم بيرقص عشرة بلدى و بأة عادى خالص إننا نسمع واحدة من إياهم بتغنى بكلام يندى له الجبين و كله عالهوا و عالمكشوف و كله بيدخل بيوتنا من غير إستئذان فبأة من الطبيعى إن إخواتى و إخواتك يشوفوا ما يقتل الحياء فى النفوس و يئد الفضيلة و يدسها فى التراب و ينشر الرذيلة .
المهم ندخل فى الموضوع .. من كام يوم كدة نما إلى علمى إن البرنامج المشهور اللامع الناجح حبيب الجماهير "ستار أكاديمى" قد هل علينا فى ثوبه الجديد اللى ميختلفش كتير عن ثوبه القديم بس أهى بعزئة فلوس والسلام المهم بأة بينى و بينكم أنا قررت أسميه "إنحدار أكاديمى" أصلى لقيت الإسم دة أنسب عشان ما شاء الله بيحقق إنحدار للأمة الإسلامية فى جميع المجالات و شايفة ناس دلوقتى بتحدفنى بالطماطم و بتقوللى اطلعى برة زهقتينا...اصبرو ا عليا بس شوية يا جماعة و يا تقنعونى يا أقنعكم..
دلوقتى البرنامج دة طل علينا من حوالى 5 سنين على القناة المحترمة جداً ال
LBC الفضائية اللبنانية..برنا مج لذيذ و ممتع و بيشد أى حد إنه يتفرج عليه و يتابعه لأخره تمام معترضناش بس إرجع بالشريط كدة بيشد اللى بيتفرج عليه و هنا بأة المشكلة و عشان كدة أنا سميته إنحدار أكاديمى ... مفهمتوش حاجة صح؟ طيب خليكوا معايا للآخر
دلوقتى أنا قعدت أدور و أدور على الإفادة اللى ممكن يحققها البرنامج دة و بصراحة كدة و على بلاطة ملقيتش أى إفادة..بل بالعكس لقيت إن البرنامج بيزرع قيم و مفاهيم هدامة فى نفوس النشأ لقيت إنحدار أخلاقى و فكرى و إيمانى إزاى بأة ؟ أقولكم..
دلوقتى لو اتفرجتوا عالبرنامج دة تلاقو شباب و بنات عايشين مع بعض لمدة 4 شهور تقريبا تحت سقف بيت واحد .. أكل و لعب و جد و حب و غنى و حفلات مع بعض و يحصل بينهم ألفة و ود و صداقة و حب و احنا قاعدين بنتفرج و بالطبع شبابنا و أطفالنا يطلعوا واخدين على المنظر دة بقى مألوف بالنسبة لهم و مش هينكروه لو حصل ادامهم و بالتالى يبقى عادى إننا نشوف علاقات بين البنات و الشباب مفتوحة لا يربطها رابط الدين ولا الحياء فيخرج أخويا و أختى و أخوك و أختك و إبنى و إبنك متعودين على كدة و مزروع القيم دى فى عقلهم دة لو ينفع نسميها قيم اصلاً و النتيجة علاقات محرمة و علاقات غير مسئولة تنتشر فى مجتمعنا وآدى اول إنحدار.. شايفة أخ بيقوللى انتى يا حاجة انتى مزوداها أوى .. أقوله والله يا أخى الفاضل أنا مش جايبة حاجة من عندى أنا بتكلم تبع دين أصلى إن شاء الله مسلمة و بخاف على دينى و على أُمة النبى ولا حضرتك مش واخد بالك و عشان مبقاش بألف هجبلك دليلى
أكد النبي محمد صلى الله عليه وسلم أن فتنة النساء هي أشد الفتن، فقال صلى الله عليه وسلم: ما تركت بعدي فتنة أضر على الرجال من النساء. رواه البخاري ومسلم
قال رسول الله صلى الله عليه وسلم قال: لا يخلون رجل بامرأة إلا ومعها ذو محرم، ولا تسافر المرأة إلا مع ذي محرم. رواه البخاري ومسلم
أظن بعد الأحاديث دى مينفعش نقول نقعد شباب و بنات مع بعض عادى و نكون سبور ولا إية؟! و أنا مجبتش كل الأدلة كمان بس دول كفاية
طيب افترضنا إنى متشائمة و ظنى سييء سيبكم من النقطة دى, نيجى عالمصيبة التانية نبص نلاقى البنات لابسين لبس فاضح يفتنوا شباب و بنات المسلمين ,ملابس تقتل الحياء و العفة و تنشر السفور و الإنحلال و أبص على وشوشهم ألاقى تبرج واضح و أوعوا حد يفتكر انه دة مش بيأثر على مجتمعنا..المناظ ر دى البنات بتقتدى بيها و بتقلدها و بينشروا الحاجات دى فى شوارعنا و نوادينا حتى إننا دلوقتى بنمشى فى الشارع و النادى و الجامعة و أكننا ماشيين فى مسرح العرائس و اتفرج يا سلام
بالله عليكم مش دة إنحدار أخلاقى و إيمانى و لا برده مزوداها؟!
طب بالله عليكم مش إنحدار فكرى لما تلاقى هم الشباب و البنات الأول أن يفوز فلان أو فلانة أو إن فلان يحب فلانة أو إن فلان يصاحب فلانة؟!
مش إنحدار فكرى لما تلاقى الشاب و الفتاة بيبددوا أموال أهاليهم فى التصويت لفلان أو لفلانة عشان يفضلوا يتحفونا بفنهم الراقى الأصيل و يفضلوا قاعدين فى الأكاديمى المحروسة ينشروا الفضيلة براحتهم؟!!
مش إنحدار فكرى و أخلاقى و دينى إنك تلاقى شريط الرسايل على القنوات الفضائية بتشجع فلان و بلده العربى و تشتم فى فلان و بلده العربى و كأن عالمنا العربى ناقص فرقة و شقاق؟!!
لو سمحت اونكل اللى شايف إنى مزوداها دة بعد كل دة يقعد على جنب
تفتكروا الإنحدارات دى و الإنحرافات دى مبتأثرش و أنا اللى مكبرة الموضوع .. طب إزاى؟ لما يكون المشاركين كلهم سنهم صغير قريب من سن الشباب و بيتفرج عليهم شباب و أطفال بيشوفوا فيهم قدوة و مثل أعلى أكيد دة هيأثر عليهم و بالتالى على المجتمع
لية الناس نسيت رقابة الله علينا و نسيت إننا هنتحاسب على التبديد اللى بيحصل للوقت و الجهد و المال؟!
و كلما تأملت وجدت إنحدار من نوع آخر .. الموضوع فعلاً كبير و لية تاثير سلبى جداً على أُمتنا لدرجة إنى سألت نفسى مش ممكن يكون دة مخطط ما من أعداء الإسلام لتسفيه عقول شبابنا وللعب بعواطفهم و عقولهم و أموالهم .. هل فعلا ممكن يكون مخطط ما عشان يبعدوا الناس عن صراط الله المستقيم و عن هدى النبى صلى الله عليه وسلم أو عشان يقتلعونا من جذورنا و يبددوا أخلاقنا و قيمنا و مبادئنا و يزرعوا فى عقولنا قيم و مبادىء مش بتاعتنا
فكروا معايا كدة البرنامج الجذاب الملفت اللى اتسلطت عليه الأضواء دة جالنا منين؟ جالنا من الغرب بقيم و مبادىء الغرب و كالعادة دايماً بناخد منهم كل ما هو لامع و براق و كأننا ملناش عقول لتُبدع و تبتكر و كالعادة بنستهلك أفكارهم و ياريتها أفكار مفيدة دى أفكار هدامة مضرة بتضرب فى أساسات بلادنا و احنا مش حاسين و سبنالهم العلم و العلماء و الإبتكارات و الإختراعات
و كان نتيجة لدة إية الشباب ضرب بقضايا أُمته و جذوره و مبادئه عرض الحائط و بأة كل همه متابعة البرنامج دة و أمثاله و بتبقى حياة المشاركين فيه جزء من حياته إلا من رحم ربى
لو تسائلت دلوقتى كام شاب دلوقتى بيقضى وقته فى عبادة الله و إعمار الأرض أو كام شاب بيهتم بإصلاح نفسه و تطويرها ..كام واحد مهتم بالقراءة و الإطلاع و المعرفة أو كام واحد بيتابع قضايا أُمته و سبحان الله إن بداية البرنامج الميمون تزامنت مع احداث غزة كام واحد من الشباب اتهز لمأساة غزة أو تابعها و كام واحد كان مشغول بإنتظار ستار أكاديمى
بلاش شوفوا احنا فين دلوقتى و الغرب فين دلوقتى هما بيزدادوا علماً و تقدماً و قوةً و تسلطاً و احنا بنزداد جهلاً و ضعفاً و فرقةً و اعتماداً عليهم
طب و بعدين هنفضل مطنشين لحد امتى ؟لحد امتى هنفضل راضيين بالوهن دة؟!!
"إنَ اللهَ لا يغيرُ ما بقومٍ حتى يغيروا ما بأنفسهم"
هنفضل راضيين إن إخواتنا بيتقتلوا و بيُشَردوا و احنا قاعدين فى بيوتنا نتابع اللى بيرمهولنا الغرب من إنفلات أخلاقى و عقلى
مش مدركين إن دى حرب العقول و سياسة التسطيح اللى بيحاربونا بيها من غير ما احنا نحس اللى من خلالها يقدروا يسيطروا على عقولنا و قلوبنا و يأسرونا و يوجهوا نظرنا للى يضرنا ولا ينفعنا عشان يخترعوا هما و يبتكروا و ياخدوا أراضينا كمان و النتيجة نفضل احنا الأضعف و هما الأقوى
احنا فى آخر الصف و هما فى أوله
احنا دايماً مستهلكين و معتمدين عليهم و هما منتجين
امتى بأة هنتحرك و نفوق و نتمسك بديننا و بهدى الرسول صلى الله عليه وسلم اللى ملأ الدنيا عدل و سلام و خلى الإسلام قوة عظمى لا يستهان بها و خلى الأُمة الإسلامية تقود الأُمم
طيب طبعا الطماطم رجعت تانى و بقوة عشان أمشى حاضر همشى أهو
بس الخلاصة احنا المفروض إننا نترفع عن مشاهدة البرنامج دة و أمثاله و نشغل وقتنا باللى ينفعنا و ينفع ديننا و هننفع بيه ولادنا إن شاء الله ,عايزين نزرع فى نفوسنا قيم و مبادىء ديننا عشان نبقى شباب مسلم بحق , شباب يفخر به النبى صلى الله عليه وسلم
شباب قادر على بناء نهضة بلده و أُمته , شباب هيربى أجيال هيتحقق على إيديها النصر على أعداء الله بإذن الله .. اللى بيحصل فى البلاد المسلمة مش مسئولية حكامها بس و لا مسئولية حكامنا بس دى مسئوليتنا كلنا, الدين مسئوليتنا كلنا لازم احنا اللى نشيل همه و ندافع عنه ,اللى هيتربى عليه إبنى و إبنك مسئوليتنا كلنا لازم نُعِد نفسنا للمسئولية دى من دلوقتى عشان هنسأل عنها أمام الله تبارك و تعالى
طولت عليكم أنا عارفة و أسفة... بارك الله فيكم الكلام دة كتبته خوفاً عليكم و على الأجيال القادمة من الفتن و حرصاً على الدين اللى هو مسئوليتنا جميعاً
و شكراً
يا جاااااااااااااا ابر واحد عصير ليمون للى مش متفق معايا, و 2 سندويتش شاورمة للى متفق معايا
و عن إذنكم بأة عشان أشوف أول حلقة من "مومبار أكاديمى" يوووووووووه.. أقصد "إنحدار أكاديمى"
فى حفظ الله
الأربعاء ديسمبر 15, 2010 10:45 am